airplanebooksbriefcase business cogs cross election entertainment fish house law lockmedicalpeopleselfservices socialtax

Suliakkiissummut najoqqutassiat 

"Inatsisit tunngaviusussat pillugit Isumalioqatigiissitat sulinermi najoqqutassaannut allannguutissatut Naalakkersuisunit siunnersuutigineqartut 29. maj 2020 Tunngaviusumik Inatsisissamut Isumalioqatigiissitaq pillugu Inatsisartut Ataatsimiititaliaata oqaluuserereerlugit akuersissutigivaat. Allannguutit tassaapput:

  • Isumalioqatigiissitanut ilaasortat Inatsisartunut ilaasortaareersut immikkut akissarsiaqartinneqassanngitsut.
  • Ilaasortat allat ataatsimiinnersiuteqartinneqarsinnaasut § 18, imm. 1-2 Inatsisartut inatsisaat nr. 22, 18 december 2003-meersoq, Inatsisartut inatsisaatigut nr. 42, 23. november 2017-imi kingullermik allanngortinneqartoq, naapertorlugu.
  • Inatsisit tunngaviusussat pillugit Isumalioqatigiissitat Kalaallit Nunaanni tunngaviusumik inatsisissamut missingiusiamik kingusinnerpaamik ulloq 31. december 2022 Naalakkersuisunut tunniussinissaq siunertaralugu suliaminik ingerlatsissasut, taamaalilluni Naalakkersuisut Inatsisartut 2023-mi upernaami ataatsimiinnissaannut misingersuusiamik saqqummiussisinnaaqqullugit. Isumalioqatigiissitat piffissamik suliffiusumik sivitsuinissamik pisariaqartitsippata, tamanna Naalakkersuisunit aamma akuerineqaqqaassaaq. 

Inatsisit tunngaviusussat pillugit Isumalioqatigiissitanut suliakkiissummut najoqqutassiaq nutartigaq uani atuarneqarsinnaavoq (2020).

Kalaallit Nunaata namminersortup inatsisaanik tunngaviusussanik sulineq naalakkersuinikkut sinaakkusiorneqarpoq maannamut marloriarluni.

Isumalioqatigiissitat sulinerminni tunngavigaat suliakkiissummut najoqqutassiamik taaneqartartoq. Isumalioqatigiissitat siulliit peqquneqarput naalagaaffeqatigiinnerup iluani atuuttussanik inatsisinik tunngaviusussanut missiliuusiussasut, peqatigisaanillu Kalaallit Nunaat naalagaaffittut namminersulerpat atuuttussanik missiliuusiussasut.

2018-imi upernaakkut Inatsisartunut qinersinerup kingorna isuma tamanna qimanneqarmat Isumalioqatigiissitat nutaat ukioq manna maajip aallaqqaataani 2019 sulilersut ataasiinnarmik siunnerfeqartumik suliakkerneqarput, tassa Kalaallit Nunaat naalagaaffinngorpat atuutilersussanik inatsisinik tunngaviusussanik missiliuusioqquneqarlutik.

Isumalioqatigiissitat sulinissaminni najoqqutassaat nutartigaq Naalakkersuisut 22. marsi 2019 akuersissutigaat, tassanilu Naalakkersuisut ilaatigut ima allapput:

”Tunngaviusumik inatsisissaq pillugu Isumalioqatigiissitap Kalaallit Nunaata tunngaviusumik inatsisissaa missingersuusiussavaa, Kalaallit Nunaata ulloq namminersulerfianiit atuutilertussanngorlugu”.

Inatsisit tunngaviusussat pillugit Isumalioqatigiissitanut suliakkiissummut najoqqutassiaq nutartigaq uani atuarneqarsinnaavoq (2019).

Tunngaviusumik Inatsisissaq pillugu Isumalioqatigiissitap suliassaasa nassuiarneqarneranni sinaakkutissatut piumasaqaatit uani atuarneqarsinnaapput (2017).