Nunatta inatsisaanik tunngaviusunik sulissuteqarnissaq 2007-imi Inatsisartuni oqaluuserineqaqqaarpoq.
Ukiut qulingiluat qaangiunneranni, 2016-imi ukiaagaa, kingumut siunnersuusiortoqaqqippoq, isumalioqatigiissitanik pilersitsisoqarnissaa Inatsisartunit tamatumuuna taperserneqarluni.
Apriilip 27-ani 2017 Inatsisit tunngaviusussat pillugit Isumalioqatigiissitat taamaasillutik pilersinneqarput. Taamanikkut inuttaapput partiit Inatsisartuni ilaasortaatitaqartut toqqartugaat katillugit arfineq-marluusut, inunnik avataaneersunik immikkut ilaasortaatitaasunik pingasunik ilaqartut.
Inatsisartunut 2018-imi upernaakkut qinersisoqarnissaa suaarutigineqarmat isumalioqatigiissitat sulinerat unitsinneqarallarpoq. Isumalioqatigiissitat nutaat 2019-imi aallarteqqipput nutaanik inuttalersugaallutik immikkullu ilaasortaatitaasunik nutaanik ilaqarlutik.
Inatsisartut 2016-imi ukiakkut ataatsimiinneranni Inatsisinut ataatsimiititaliap Isumalioqatigiissitanik pilersitsisoqarnissaanik isumaliutississutaa uani atuarneqarsinnaavoq.
Inatsisinut tunngaviusussanut Isumalioqatigiissitanik pilersitinissamut Naalakkersuisut nalunaarusiaat uani atuarneqarsinnaavoq.
Isumalioqatigiissitat nutaat
Inatsisit tunngaviusussat pillugit isumalioqatigiissitat Naalakkersuisut maajip aallaqqaataanni 2019 pilersippaat. Tamatumuuna Inatsisartuni partiit inunnik inatsisartunut qinigaasimanngikkaluartunilluunniit isumalioqatigiissitat ilaasortassaanik innersuussisinnaatitaapput.
Naligiissitaanissaq pillugu inatsit malillugu Isumalioqatigiissitani nutaani ilaasortat arnat angutillu sapinngisamik amerlaqatigiissinneqarnissaat piumasarineqarpoq.
Isumalioqatigiissitat Naalakkersuisullu tamarmik immikkut inunnik suliakkiunneqartumut immikkut ilisimasalinnik marlunniit sisamanut peqataasartussanik toqqaasinnaatitaapput.
Inatsisartuni partii annerpaaq Isumalioqatigiissitat siulittaasussaannik, Inatsisartunilu partiit annerpaat tulliat Isumalioqatigiissitani siulittaasup tullersortissaanik toqqaassapput.
Partiit innersuussaat malillugit Naalakkersuisut isumalioqatigiissitani ilaasortassatut toqqagaat uku ulloq 1. maj 2019 ilaasortaalerput:
Siulittaasoq: Ineqi Skourup Kielsen, sinniisussaralugu Suinni Johansen
Siulittaasup tullia: Kuupik Vandersee Kleist, sinniisussaralugu Marianne Jensen.
Ilaasortaq: Nivi Olsen.
Ilaasortaq: Aleqa Hammond sinniisussaralugu Ole Aggu Markussen.
Ilaasortaq: Pele Broberg
Sulinissamut piffissaliussaq
Isumalioqatigiissitat tunngaviusumik inatsisissamut missiliuusiani ukioq 2021 naalerpat Naalakkersuisunut tunniutissavaat.
Missiliusiaq Inatsisartut 2021-mi ukiakkut ataatsimiinneranni Naalakkersuisunit saqqummiunneqassaaq. Isumalioqatigiissitat tunngaviusumik inatsisissatut siunnersuusiornermi saniatigut isumaliutissiissummik suliaqassapput, ilaatigut tassani tunngaviusumik inatsimmi aalajangersakkat ataasiakkaat sukumiinerusumik nassuiaatigineqassallutik.
Innuttaasunik peqataatitsineq
Suliakkiissummut najoqqutassiaq naapertorlugu innuttaasunik peqataatitsinissaq isumalioqatigiissitat naammassiniartussaavaat.
Nunatta isorartunera, angalaniarnerullu akisunera pissutigalugit tusagassiuutit assigiinngitsut internettilu atorluarneqassapput.
Isumalioqatigiissitat pingaartippaat inuit qanimut tikillugit ataatsimeeqatigalugillu oqaloqatigisarnissaat.
Aaqqissuussat saniatigut innuttaasut namminneerlutik suliniuteqarusuttut aamma tikilluaqqusaapput.
Kalaallit Nunaanni innuttaasut tamarmik inatsisinut tunngaviusussanut siunnersuutinik nassiussaqarnissamut periarfissaqarput.
Isumalioqatigiissitat e-maileraat: tunngavik@nanoq.gl
Nittartagaq
Isumalioqatigiissitat nittartagaanni paasissutissat atuarneqarlutillu uani aaneqarsinnaapput: www.tunngavik.gl
Isumalioqatigiissitat sulinerata ineriartornera nittartakkakkut ilisimatitsissutigineqartassaaq taamatullu Isumalioqatigiissitani isumaliutigineqarallartut qaammarsaaniutillu tamanut ingerlaavartumik saqqummiunneqartarlutillu tusarniutigineqartassapput.
Isumalioqatigiissitat siulliit pillugit paasissutissat uani atuarneqarsinnaapput.
Uani Isumalioqatigiissitat suleriaasiat aammalu sulinermi ileqqorissaarnikkut ileqqoreqqusat atuarneqarsinnaapput
Inatsit tunngaviusussaq pillugu isumalioqatigiissitap suleriaasia 2022-meersoq
Inunnik qaammarsaasunut ileqqoreqqusat
Tusarniaanermi ileqqoreqqusat
Tunngaviusunik inatsisiliortunut ileqqoreqqusat