airplanebooksbriefcase business cogs cross election entertainment fish house law lockmedicalpeopleselfservices socialtax

Namminersulernissartik pillugu Cataloniamiut taasisinneqarnerat ataqqineqarli!

Cataloniamiut namminiilivinnissamik kissaateqarnerat Inatsisit tunngaviusussat pillugit Isumalioqatigiissitanit paasilluarneqarpoq.
11. januar 2017
Tusagassiorfinnut nalunaarut
Cataloniamiut qanittumi aperineqarput Cataloniap kunngiitsuuffittut naalagaaffinngornissaa tapersersorneritsik. Taasiartortut 90 %-iisa angerpaat Catalonia namminersortunngussasoq, taamaattoq inunnik taasisitsineq naalagaaffiup Spaniap akueriumanngittuarsinnarpaa.

Tunngaviusumik inatsisissaq pillugu Isumalioqatigiissitaq misigivoq aamma Nunatsinnit qisuariartoqartariaqartoq, catalanerit pineqarnerat pillugu.

Isumalioqatigiissitap siulittaasua Vivian Motzfeldt oqaaseqarpoq: "Nunarsuarmioqatigut kiffaanngissuseqarnermik ilungersuutiginnittut assigalugit catalanerit namminersulerusunnerat paasilluarparput. Killiliiffigineqarani isummersinnaaneq inuit pisinnaatitaaffiisa pingaarnersaraat. Taamaammat catalanerit siunissartik pillugu isummernerat suusupagalugu naalagaaffiup Spaniap pissusilersornera kalaallit isaannit isigalugu naapertuilluanngitsuliorneruvoq. Tupiginngilarput maanna Savalimmiormiut ilaat politikeri nuimasoq oqarmat cataloniamiut namminersulerusunnerat Spaniap nammineq pisuussutigimmagu."

Catalonia Spaniap ilagivaa. Nunap immikkoortua taanna 2016-imi 7,5 millioninik inoqarpoq. Vivian Motzfeldt nangippoq: "Cataloniami amerlanerungaartut isumaat suusupagineqarsinnaammat uagutsinnut tupinnarluinnarpoq. Ajortoqarpoq. Qujanartumilli inuiaat assigiinngitsut, soorlu naalagaaffiitsut, inuiattut siunissartik nammineq aalajangiiffigisassartik ilisimaaralugu sukakkaluttuinnarput. Qujanartumillu oqaloqatigiinnerup isumaqatiginninniarnerullu aqqutaa amerlanersaasa atorusuppaat. Uagut kalaallit kisimiinngilagut namminersulerusuttut, taamaammat catalanerit namminersulerusunnerat pillugu catalanerinik tapersersuinerput matumuuna nalunaarutigaarput."

Isumalioqatigiissitaq oktoberip ulluisa arfernganni ataatsimiinnermini aalajangerpoq Cataloniami pisoq pillugu Naalakkersuisut Inatsisartulluunniit qisuariaateqanngippata allatut ajornartumik Isumalioqatigiissitaq taamatut qisuariaateqassasoq.

Inussiarnersumik Inuulluaqqusillunga
Vivian Motzfeldt, siulittaasoq, Tunngaviusumik inatsisissaq pillugu Isumalioqatigiissitaq
Inatsisit tunngaviusussat pillugit Isumalioqatigiissitani siulittaasoq Vivian Motzfeldt.