Inatsisit tunngaviusussat pillugit isumalioqatigiissitat Islandimut tikeraarput

Tunngaviusumik inatsisissaq pillugu Isumalioqatigiissitat Islandimut tikeraarput augustip aallaqqaataanit qulingiluaat ilanngullugu. Angalanerup siunertaraa Islandermiut tunngaviusumik inatsisertik pillugu qanoq aaqqissuussinerat qanorlu suleriaaseqarnerat pillugu sukumiisumik paasisassarsiornissaq.

Naluneqanngitsutut Islandi Danmarkimut aamma atanikuuvoq. Taamaammat Islandip naalagaaffinngoriartornerani aqqusaartorneqarsimasut misilittagarineqarsimasullu ilanngullugit paasisassarfigiumallugit Islandi siulliullugu Isumalioqatigiissitat tikeraarusussimavaat.

Isumalioqatigiissitat siulittaasuat Vivian Motzfeldt oqarpoq: ”Præsident Gudni Th. Johannessonip naapinnera assorsuaq pissarsiaqarfigivarput. Nunatta maanna alloriarnera soqutigalugu malinnaaffigigaa nuannerpoq paasillugu. Ataatsimooruteqarnerput malunnartorujussuuvoq. Ataasiarani oqarfigivaatigut nunatut sanileriissuunerput inuiattullu ikinngutigiinnerput suli inerisartuartariaqarivut. Kissaatigaa Islandip nunattalu suleqatigiinnerat suli nukittorsarneqassasoq, soorlu Nunat Killiit Siunnersuisooqatigiit aqqutigalugit.”

Pæsidenti nunarput pillugu qaammaasaqartoq oqarpoq taamatut alloriarnerani pingaaruteqarluinnartuusoq nunatsinni ilinniartitaanerup ilisimatusarnerullu qaffassarneqartuarnissaat, soorlu Islandimi taamaalior-simasut. Tamatuma saniatigut inuussutissarsiornikkut siuarsaanermi nunatta Islandillu suleqatigiinnerunissaat kaammattuutigaa.

Naggataatigut præsidenti erseqqissaavoq tunngaviusumik inatsisissaq tassaaginnalerumaassanngitsoq suna allassimaannartoq. Paasinninnerput malillugu præsidentip kalaallinut tamanut oqariartuutaa unaavoq apeqqutaanerpaarpaasoq kalaallit imminut tatigisuunissaat, anguniakkaminnik ilumut iluatsitsisinnaanerminnik upperinninnissaat.

Isumalioqatigiissitap siulittaasua Vivian Motzfeldt naggataatigut oqarpoq: ”Qujavugut nuannaarutigalugulu kalaallit tunngaviusumik inatsisissaannik suliaqarnitsinni Islandermiunik immikkut paasisimasalinnik isumalluuteqarsinnaanerput præsidentip ammatimmagu. Isumaqarpunga Islandip taamatut isaassinera tigulluassagipput.”

Ullumi augustip ulluisa sisamaanni Altinget – Islandimi Inatsisartut – paasisassarsiorfigineqarput.

Inussiarnersumik Inuulluaqqusillunga
Vivian Motzfeldt, Inatsisitit tunngaviusussat pillugit Isumalioqatigiissitat siulittaasuat