Tunngaviusumik inatsisissaq pillugu Isumalioqatigiissitap Islandimut paasisassarsiorluni angalanini naammasseqqammerpaa

”Paasisassarsiornerput pissarsiaqarnaqaaq, ilaatigut suli eqqarsaatigisimanngisatsinnik immersorneqaqaagut. Nunatsinnut uterpugut misigaluta ukiuni tulliuttuni ingerlavissarput qanoq isikkoqarnersoq erseqqinnerusumik takusinnaalersimallutigu, taamaasillutalu suliniutissagut assigiinngitsut qanoq qaqugulu ingerlattussaanerlutigit.”

Præsident Gudni Th. Johannessonip saniatigut Isumalioqatigiissitap naapippai Altingip allattaanerata tullia Thorsteinn Magnusson, Águst Thor Arnasson Akureyrip ilisimatusarfianinngaanneersoq, Jón Olafsson, Thorvaldur Gylfasson aamma Salvör Nordal Islandip ilisimatusarfissuaninngaanneersut, kiisalu Pall Thorhallsson Prime Minister’s Office, Director General - Department of Legislative Affairs.

Isumalioqatigiissitap siulittaasuata tullia Mimi Karlsen naliliivoq: “Qujanaqaaq inuit assigiinngitsut naapikkatsigit. Isummat paasinnittaatsillu assigiinngitsut taamaasillugit aamma tusarfigigatsigit iluaqaaq. Island-imi paasisagut sulinitsinni qanoq atussanerigut paasinarsiartuaaruusaalissaaq, pingaaruteqarporli paasissallugu neriorsuissannginnatta. Neriorsuissanngilagut Nunarput namminersulivippat taava suna tamarmi aaqqissasoq. Maanna suliassatta pingaarnersaraat kalaaleqatittalu peqataatinniarnissaat suniarnitsinnik, aammalu sooq taamaasiorniarnitsinnik.”

Islandermiut ikiuukkusunnerat Isumalioqatigiissitap qujaruppaa. Isumalioqatigiissitarli isumaqarpoq inuiaat allat misilittagaat aamma paasisaqarfigissallugit kiisalu immikkut ilisimasalinnik naapitsinissaq pisariaqartoq.

Isumalioqatigiissitap siulittaasua Vivian Motzfeldt naggasiivoq: “Paasisanik nutaanik ulikkaarpugut. Angalanitsinnik nalunaarusiarput naammasseriarpat qilanaarpugut paasisatsinnik ingerlatitseqqiinissatsinnut.”

Isumalioqatigiissitaq tuliiani ataatsimeeqqissaaq ukiakkut Inatsisartut ataatsimiinnissaat sioqqullugu.

Inussiarnersumik Inuulluaqqusillunga
Vivian Motzfeldt, siulittaasoq, Mimi Karlsen, siulittaasup tullia