Paragraffitut ilusilik ajugaavoq

Ilisarnaatissatut titartagarpaalussuit kusanarluinnartut akornanni Nils Baumip ilisarnaasiaa, Inatsisit tunngaviusussat pillugit Isumalioqatigiissitat suliaannut anguniagaannullu kusanartumik akunnaatsumillu ilisarnaataalluarsinnaanerpaatut toqqagaavoq. Nils Baum Inatsisartut Allattoqarfianni 2009-miilli paasissutissiisartutut atorfeqartoq titartakkani ilisarnaatissatut toqqarneqarmat assut tulluusimaarpoq:

- Inatsisartut Allattoqarfianni pissanganartunik nuannersunillu suliaqarfigisanni sulianik kusanartunik takujuminartunillu pilersitsisarnissamut eqqummaarinneruleriartorsimanera ajugaaninnut pissutaaqataasoraara. Takutinniakkap kusanartuliaanera soqutiginarsaaqataalluinnartaraluartoq imarisaali aamma aalajangeeqataasuulluinnartarpoq.

Ilisarnaasiornissamut unammeqataanissat qanoq ilillutit isumassarsiaraajuk?
- Ilisarnaasiornissamut unammisitsinissamik ussassaarut aviisi Sermitsiakkut siorna septembarimi saqqummiunneqarmat misiliiniarlunga pileritsappunga.

Ilisarnaasiavit isikkussaa suminngaanniit isumassarsiaraajuk?
- Aapparalu tamatta immikkut siunnersuutissatsinnik titartaavugut. Aapparma atuagaq Kalaallit Nunaartalik Kalaallillu erfalasuannik ilisarnaatilik titartaraa uanga paragraffip ilisarnaataa assilillugu titartaaqqaarpunga. Aapparma Erfalasutsinnik ilangussinera isumassarsiffigilluariarakku Erfalasorput paragraffialiama iluanut inissippara, tassami Erfalasorput pinnarilluinnagara ilisarnaasianni pinngitsoorani arlaatigut ersarittariaqarmat. Erfalasorput paragraffiliama iluanut inisseriarakku takusinnaalerpara Inatsisit tunngaviusussat pillugit Isumalioqatigiissitat suliaannut tunngasumik ersersitsiniarnera ilisarnarsilluartoq.

Siornatigit ilisarnaasiortareerpit?
- Inatsisartut ilisarnaataata 2010-meersup isikkua allanngortivinngikkaluarlugu allatulaarli ilusilerlugu saqqummersittarnissa pillugu oqallinnernut peqataasarsimavunga assassorlunili suliassavittaanut soorunami ilaasanngilanga.

Inatsisit tunngaviusussat pillugit Isumalioqatigiissitat ilisarnaatissaannik unammisitsinermi ajugaanerit qanoq misigaajuk?
- Ajugaangama tanngassimaartorujussuullungalu nuannaaqaanga. Inatsisit tunngaviusussat pillugit Isumalioqatigiissitat sulinerat suli malunnaateqarujussualeriinngikkaluartoq – aallartilluarpalli, neriuppunga ilisarnaasiara suliap pingaaruteqaqisup soqutigineqarnerulernissaanut iluaqutaajumaartoq. Naleqartitat suut Kalaallit inatsisissaannut tunngaviusunut ilanngunneqarnissaat pissanganartorujussuuvoq, neriuppungalu suliaq tamanna pingaaruteqarluinnartoq innuttaasunit amerlanerpaanit oqalliseqataalluarfigineqarumaartoq, Nils Baum naggasiivoq.

Inatsisit tunngaviusussat pillugit Isumalioqatigiissitat ilisarnaasiortitsillutik unammisitsineranni ajugaasoq diplomimik kusanartumik 10.000 koruuninik aningaasartalimmik tunineqarpoq.