Inatsisit tunngaviusussat pillugit Isumalioqatigiissitat Aningaasaqarnermut Nunanilu Avannarlerni suleqatigiinnermut Naalakkersuisumit Vittus Qujaukitsumit pisortatigoortumik maajip 28-anni 2019 ivertinneqarput.
Isumalioqatigiissitanut ilaasortaasut tamarmiullutik aallaqqaammut erseqqissarpaat suliassap pingaarnersarigaa Kalaallit Nunaata siunissaata ataatsimoortumik tunngavissiorneqarnissaa, taamaasiornikkut inuiaat ataatsimoortut pilersinneqarsinnaaqqullugit.
Naalakkersuisunut ilaasortaq aamma isumalioqatigiissitat siulittaasuat Doris. J. Jensen tamarmik isumaqatigiillutik oqaaseqarput ulloq taanna Kalaallit Nunaata oqaluttuarisaanerani malunnaateqartuusoq isumalioqatigiissitat nutaat suliartik aallartissinnaanngormassuk.
Aningaasaqarnermut Nunanilu Avannarlerni suleqatigiinnermut Naalakkersuisoq ilaatigut oqaaseqarpoq: ”Ullumikkut ulloq Kalaallit Nunaanni oqaluttuarisaanikkut pingaartinneqarluni eqqaamaneqartassasoq neriuutigaara. Oqaluttuarisaanikkut ulloq manna immikkuullarissuseqarpoq. Kinguaariimmi tulliisa ulloq manna pingaartillugu eqqaamajuartussanngorpaat.”
Isumalioqatigiissitat taamatut inissitsiterlutik ataatsimiinneranni ilaasortanngortut tamarmiullutik najuupput, tassaasut siulittaasup saniatigut siulittaasup tullia Kuupik V. Kleist, Nivi Olsen (siulittaasoqarfimmut ilaasortanngortoq), Per Rosing-Petersen, Bentiaraq Ottosen, Aleqa Hammond, kiisalu Anita Hoffer.
Ivertitaanermut atatillugu siulittaasoq Doris J. Jensen oqalugiarami ilaatigut ima oqaaseqarpoq: ”Isumalioqatigiissitat suliassartik ilisimaaralugu imminnut ikioqatigiillutik suleqatigiillutillu ataatsimut ingerlassapput suliassamilu Kalaallit Nunaata naalakkersuinikkut oqaluttuarisaanerani aatsaat taama pingaaruteqartigisumi partiilersortoqassanngilaq.”
Isumalioqatigiissitanut ilaasortat tamarmiullutik isumaqatigiipputtaaq inatsisinut tunngaviusussanut missiliuut inerpat taanna aallaavigalugu innuttaasunik peqataatitsinissaq aallunneqalissasoq.
Tamatuma tungaanut isumalioqatigiissitat pilersaarusiorlutillu suliassanik pisussanillu tulleriinnilersuissapput.
Isumalioqatigiissitat suliassaq pingaaruteqartoq, pissanganartoq ilungersorfiusussarlu qilanaaralugu tiguaat.
Isumalioqatigiissitat siullermeerutaasumik ileqquusumik ataatsimiissapput tallimanngornermi 7. juuni 2019.
Siulittaasup Doris J. Jensenip oqalugiaatai ataani oqaatsit tungujortumik qalipaasikkat toorlugit aakkit:
Inatsisit tunngaviususat pillugit Isumalioqatigiissitat allattoqarfiata assilisai uani takukkit.
Siulittaasup Doris J. Jensenip ivertitsinermi oqalugiaataa uani tusarnaaruk.
Siulittaasullu tikilluaqqusilluni oqalugiarnera uani isiginnaaruk.
