airplanebooksbriefcase business cogs cross election entertainment fish house law lockmedicalpeopleselfservices socialtax

Sulinitsinni tunngavigisarput iluarsineqartariaqalerpoq

Tunngaviusumik inatsisissaq pillugu isumalioqatigiissitaq suliakkiissutinut najoqqutassiaq malillugu sulisussaavoq.
5. januar 2018
Kronikki / aviisini allaatigisaq
Naluneqanngitsutut piumasaqaataavoq partiit Inatsisartuni ilaasortaatitaqartut tamarmik ilaasortaatitaqassasut, aammalu ilaasortaasut pinngitsooratik Inatsisartunut ilaasortaasuusariaqartut. Atassutip Inatsisartunut ilaasortaatitaqarunnaarneratigut aammalu Kommune Qeqertalimmi borgmesterinngortussap Inatsisartunut ilaasortaajunnaarneratigut sulinitsinni tunngavigisarput naleqqukkunnaarmat novemberi aallartilaaginnartoq Naalakkersuisut qinnuigaagut suliakkiissutinut najoqqutassiaq nutaanngorsaqqullugu.

Tungaanut taamanikkut aalajangerpugut sulinerput unitsikkallarniarlugu, neriulluta Naalakkersuisut sulisitsisutut akisussaassusertik naapertorlugu ajornartorsiut pilertortumik aaqqiivigissagaat, sulinitsinni tunngavigisatsinnik ilerasuutigalugu unioqqutitsilluta ingerlasinnaannginnatta. Naak Inatsisartunut ilaasortaanerput salliutittartussaagaluarlutigu isumaqarpugut Isumalioqatigiissitamut tunniusimalluta sulisimasugut, miserratigissanngilarpulli piffissaqarniarnerput ilaanni kipungasoorutaasarmat. Taamaammat ukiarmi Inatsisartuni partiit amerlanerussuteqartut aalajangerput Isumalioqatigiissitap pilersaarutai suliniutigiumasaalu naammassisinnaajumallugit aamalu innuttaasunik pitsaanerusumik peqataatitsinissaq anguniarlugu Isumalioqatigiissitaq suliutigaluni siulittaasoqartariaqartoq.

Maanna uaniippugut sulinitsinni tunngavigisarput nutaaq Naalakkersuisut akuereriarpassuk suleriaqqissinnaanngussalluta. Tassa piareersimavugut. Eqqaamasariaqarportaaq Isumalioqatigiissitaq aallaqqaataaniilli immikkut allaffeqartitaanngimmat aammalu Isumalioqatigiissitaq maj 2017-imi pilersinneqarmat ilisimaneqareermat piviusumik aaqqissuussaasumillu sulinissamut ukiup affaata missaa piareersaasiorfioqqaartariaqartoq. Taamaattorli Isumalioqatigiissitaq 2017-imi arlaleriarluni ataatsimittareersimalerpoq, ilaatigullu oktoberimili 2020-ip tungaanut sulinissamut pilersaarummik suliaqalereersimalluta. Pilersaarutaasunit pingaarnersiuissagutta ukioq manna qaammarsaanermut paasisitsiniaanermullu annerusumik atorusupparput, 2019 innuttaasut ukiuattut taallugu innuttaasut qanimut peqatigalugit tunngaviusumik inatsisissap imarisassaanik siunnersuusiorfittut atorusupparput, kiisalu sulinerput 2020-ip naalernerani naammasserusullugu.

Naggataatigut nuannaralugu oqaatigissavarput nunatta tunngaviusumik inatsisissaanik sulinerup pingaaruteqassusia isumaalu pillugit ataatsimeersuartitsinissarput ukioq manna pisussatut siunniukkatsigu, taamaammat qilanaarpugut avammut sammisumik sulinitta nanginnissaanut. Periarfissaq manna iluatsillugu nunaqqatigut tamaasa ukiortaami pilluaqqujumavagut ukiumilu nutaami ajunngitsunik tamanik kissaallugit.

Inussiarnersumik Inuulluaqqusilluta

Vivian Motzfeldt, siulittaasoq
Mimi Karlsen, siulittaasup tullia
Inatsisit tunngaviusussat pillugit Isumalioqatigiissitat siulittaasuat Vivian Motzfeldt.