Inatsisit tunngaviusussat pillugit Isumalioqatigiissitat sulinerup pilersaarusiorneqarnera sammillugu isumasioqatigeeqqammerput, Ilulissani ingerlanneqartumik.
Isumalioqatigiissitat aamma iluminni suleqatigiissitanik marlunnik pilersitsipput qulequttanik aalajangersimasunik samminnittussanik. Suleqatigiissitat arlaanni siulittaasunngorpoq Nivi Olsen aappaanilu Mimi Karlsen.Pilersaarut akuerineqartoq naapertorlugu Isumalioqatigiissitat sulinertik naammassissavaat 2020-imi, inuiattut ullorsiornerput nalerorlugu. Taamanikkussamut isumaliutissiissut aammalu inatsisit tunngaviusussat pillugit missiliuut Naalakkersuisunut tunniunneqassapput.
Innuttaasunik peqataatitsineq
Isumalioqatigiissitat isumasioqatigiinnerminni innuttaasunik peqataatitsinissaq pingaartillugu sammivaat. Siulittaasoq Vivian Motzfeldt ima oqarpoq:
- Inatsisinik tunngaviusunik suliaqarnitsinni innuttaasut tikillugit oqaloqatigiinnikkut isumasiortartussaagatsigit qanoq pitsaanerpaamik aamma periutsit suut atorlugit innuttaasunik peqataatitsinissaq annertuumik eqqartuiffigaarput.
Ilulissani innuttaasunik ataatsimiititsineq
Ilulissani innuttaasunik ataatsimiititsinermi apeqqutit inatsisinut tunngaviusussanut tunngasut assigiinngitsut oqaloqatigiissutigineqarput.
Vivian Motzfeldt ima oqarpoq:- Isumalioqatigiissitat innuttaasunik ataatsimiitsitserngaarnerat uummaarissumik ingerlanneqarpoq, apeqqutit pingaarutillit, soorlu inuiattut naleqartitatta inatsisissani tunngaviusuniittariaqarnerat qaqinneqartunut ilaavoq. Innuttaasunik qanimut oqaloqateqartarnissaq Isumalioqatigiissitat sulinerannut nalituupilussuummat inuit tikivillugit naapitsisarnissarput Ilulissani ataatsimiititsinitta takutippaa.
Avannaata Kommunianik isumaqatigiissusiorneq
Inatsisinik tunngaviusussanik suliaqarnermi kommuninik qanimut suleqateqarnissaq Isumalioqatigiissitanit pingaartinneqarpoq. Tamatumani kommuneqarfinni tamani innuttaasut sapinngisamik amerlanerpaartaasa peqataatinneqarnissaat Isumalioqatigiissitat kommunillu suleqatigiillutik kivitseqatigiinnikkut naammassiniassavaat. Tamatuma tungaanut Avannaata Kommunianik isumaqatigiissusiorneq alloriarnerit siullersarivaat.
Attavigisassaq:
Vivian Motzfeldt, siulittaasoq
Inatsisit tunngaviusussat pillugit Isumalioqatigissitat Avannaata kommuniatalu peqateqarnermik isumaqatigiissutaat uani atuaruk.
