Inatsisit tunngaviusussat pillugit Isumalioqatigiissitat 29.- 30. august 2019 ileqquusumik ataatsimiipput isumasioqatigiinnertalimmik, angusaqarfiulluartumik.
Ilaasortat saniatigut immikkut ilaasortaatitat marluk peqataarngaarput, tassa Nunatta Katersugaasiviani Allagaateqarfianilu pisortaasoq Daniel Thorleifsen aamma Ilimatusarfimmi adjunkti Rosannguaq Rossen.
Isumalioqatigiissitat iluminni suleqatigiissitanik pilersitsipput pingasunik. Taakku inatsisit tunngaviusussat missiliuusiorfigineqarnissaat akisussaaffigissavaat.
Suleqatigiissitat pilersinneqartut tassaapput:
- Naalakkersuisaaseq pillugu suleqatigiissitat, siulittaasoralugu Per Rosing-Petersen.
- Pisinnaatitaaffiit pisussaaffiillu pillugit suleqatigiissitat, siulittaasoralugu Anita Hoffer.
- Nunanut allanut sillimaniarnermullu tunngasut pillugit suleqatigiissitat, siulittaasoralugu Aleqa Hammond.
Isumalioqatigiissitat siulittaasuat Doris J. Jensen ima oqaaseqarpoq:
”Isumalioqatigiissitat iluminni suleqatigiissitanik pilersitsinissaat qilanaarisimavara, taamaalilluni inatsisit tunngaviusussat imarisassaannik assigiinngitsunik suliaqarnerput aallartissinnaanngormat. Suleqatigiissitat pilersinneqartut sulilluarnissaat qularutiginngilara.”
Isumalioqatigiissitat tullissaanik ileqquusumik ataatsimiissapput ukiumi nutaami. Tamatuma tungaanut suleqatigiissitat ataasiakkaat sulinerminni tunngavissaminnik aalajangersaassapput, aammalu sulinermut pilersaarusiassatik inaarsassallugit.
Siulittaasup Doris J. Jensenip saqqummiussinera videomi uani takujuk.
