Inatsit Tunngaviusussaq Pillugu Isumalioqatigiissitat pingasunngornermi maajip aqqarngani 2022, ukioq manna pingajussaanik ileqquusumik ataatsimiipput

Isumalioqatigiissitani ileqquusumik ataatsimiinneq ukiumut sisamariarlugu aaqqissuunneqartarpoq, pingasunngormallu Nuummi Inuk Hostelsimi ingerlanneqarpoq – naluneqanngitsutut Inatsit tunngaviusussaq pillugu Isumalioqatigiissitat tusagassiutini eqqartorneqangaatsiarput, taamaakkaluartoq suliaq uninngaannanngilaq, suleriaqqinnissarlu ataatsimiinnermi pingaarnertut eqqartorneqarpoq.

- Naak tusagassiutini sammineqarnerput annertugaluartoq Inatsit tunngaviusussaq pillugu Isumalioqatigiissitat sulinerat uninngaannanngilaq. Qanoq suleriaqqinnissarput eqqartorparput qilanaarpugullu suleriaqqinnissatsinnut, siulittaasuugallartoq Ineqi Kielsen oqarpoq.

Inatsimmut tunngaviusussamut missiliuummik suliaqarnerup annersaa naammassineqangajalerpoq inaarsaasoqarnissaalu maanna aallartisarneqartussanngorluni. Suleqatigiissitat pingasuusut Inatsimmik tunngaviusussamik suliaqartut immikkut suliunnaarlutik ataatsimut sulilernissaat pilersaarutaavoq taamaasilluni Inatsimmut tunngaviusussamut missiliuut Inatsit tunngaviusussaq pillugu Isumalioqatigiissitanit inaarsarneqartussanngorluni.

Ileqquusumik ataatsimiinnermi ilaatigut nunarput naalagaaffinngussappat qanoq ittumik naalakkersueriaaseqartoqarnissaanut aalajangiinissamut tunngatillugu workshoppertitsisoqarnissaa eqqartorneqarpoq.

Ataatsimiinneq Isumalioqatigiissitani siulittaasuugallartumit Isumalioqatigiissitallu allattoqarfianit aaqqissuunneqarpoq ingerlanneqarlunilu.