Innuttaasunik paasititsiniaanissaq pingaartinneqarpoq

Ataatsimiinnermi Suliakkiut kingulleq eqqartorneqartunut ilaavoq. Suliakkiut nutaaq Isumalioqatigiissitat sulinerminni malitassaat septembarip pingajuani 2021-mi Naalakkersuisunit tunniunneqarpoq, tassanilu innuttaasunik peqataatitsinissaq Naalakkersuisunit peerneqarpoq. Tassani missiliuusiornermi naammassinissamut piffissarititaasup sivikippallaarnera Covid-19-ilu pissutaallutik suliamut tunngatillugu kinguaattoortoqarnikuunera pissutaapput.

Suliakkiummi nutaami ilaatigut allaqqavoq suliakkiut decembarimi 2022-mi Naalakkersuisunut tunniunneqarpat Naalakkersuisunit innuttaasunik peqataatitsinissaq ingerlanneqarumaartoq.

“Naak innuttaasut tikillugit peqataatitsisinnaanngikkaluarluta Inatsit tunngaviusussaq pillugu Isumalioqatigiissitat sulinerannut tunngasunik tamat oqallittarfiisigut nittartagarlu atorlugu paasititsiniaanissarput pingaartipparput maannalu tamanna piareersarneqaleruttorpoq”
Inatsit tunngaviusussaq pillugu Isumalioqatigiissitani siulittaasoq Kuupik V. Kleist oqarpoq.

Ataatsimiinnermittaaq suleqatigiissitat pingasut inatsimmut tunngaviusussamut missiliuusiornerat killiffissiorneqarpoq Naalakkersuisunullu tunniussinissaq qanillimmat suleqatigiissitat missiliuusiaasa ataatsimut katiterlugit inaarsarneqarnissaat eqqartorneqarpoq.

Ataatsimiinneq Isumalioqatigiissitani siulittaasumit Isumalioqatigiissitallu allattoqarfianit aaqqissuunneqarpoq ingerlanneqarlunilu. Isumalioqatigiissitat pingajussaanik ileqquusumik ataatsimeeqqissamaarput maajip aqqarngani 2022.

Attavissat:
Allattoqarfimmi pisortaagallartoq, Maliina Junge Jørgensen +299 580147
Paasissutissiinermi pisortaq, Pipaluk Egede Poulsen, +299 580148.